Arsenal don dey see road small to see weda dem kwalify for de
knockout stage for dis seasin Champions League, afta dem waya Olympique
Marseille 2-0 for dia Group F match wey dem play for Emirates Stadium.
Marseille, wey neva kollect even one point for dis seasin competition
bin wan use Arsenal arrange tins but yawa go as for de veri fes minute
of de match as Jack Wilshere score wit beta laba-laba wey kipa Steve
Mandanda no fit catch to make am 1-0.
Mesut Ozil sef come miss penariti for de fes haf afta dem drag Aaron
Ramsey for ground as Arsenal begin dey show de France team pepper. Dem
miss plenti chance for de fes haf to add more gols.
Jack Wilshere come setul matter for de secon haf as hin score Arsenal
secon gol to take kill de match, as de gunnas go now enta Napoli side
for dia las group match to find point wey go make de kwalify for de
knock-out.
Dortmund come make de arithmetic be one kain as dem waya Napoli 3-1 for
Germany dia. Na Marco Reus fes score for Dortmund for de 10 minute thru
penariti bifor Jakub Blaszczykowski make am 2-0.
Napoli come drag one gol enta Dortmund net as Lorenzo Insigne gol come
gif dem hope, But Gabon strika Pierre Emerick Aubameyang come scatta dia
plans come make am 3-1 for de Germany team.
Ajax Amsterdam be de baba for Tuesday Champions League gbege as dem beat
Barcelona 2-1, but Barca don alreadi kwalify sha. Lionel Messi bin no
dress for de match as Ajax show Barca pepper for de fes haf.
South Africa pikin Thulani Serero fes score for Ajax for de 19 minut
bifor Danny Hoesen come make am 2-0 jus bifor haf time. Yawa come gas
for Ajax as second haf resume as Joel Veltman kollect red kad waka lif
field.
Xavi come kollect one gol from pena for Barca but Ajax sef manage hol dem till match kpai.
Milan do Celtic shege dia for Scotland sef and na Kaka bin de conductor wey helep dem win.
De Brazil guyman open road for Milan for de 13 minute bifor Cristian
Zapata make am 2-0. Secon haf sef no gud for Celtic as Mario Balotelli
come add hin own join to make am 3-0 for de Scotland team bakyad.
Chelsea, wey don already kwalify for de knock out stage enta Switzerland
wit korrect swagga but Basel come do dem strong tin as Mohamed Salah
gol for mortuari time come make am say Basel don beat de England team
home and away dis seasin be dat.
Our naija pikin John Mikel Obi play de match and hin even chop yellow
kad for de match as e come be say na de two teams go waka enta de knock
out stage as Jose Mourinho come tear for hin boys say dem supose lose
sef.
"Na veri bad match, dem supose win us," Mourinho tok$ "I no llike wetin we tap from fes minute reach las sef."
Na all de results from Tuesday matches be dis:
Zenith St Petersburg 1 Atletico Madrid 1
FC Porto 1 Austria Vienna 1
Celtic 0 AC Milan 3
Ajax 2 Barcelona 1
Borussia Dortmund 3 Napoli 1
Arsenal 2 Olympique Marseille 0
Basel 1 Chelsea 0
Steaua. Bucharest 0 Schalke 04 0
This is a short description in the author block about the author. You edit it by entering text in the "Biographical Info" field in the user admin panel.
0 comments:
Post a Comment